మెదడుకు పట్టిన బూజు దులపండి

(తుర్లపాటి ఆలోచన సుగంధం) 

   హాయ్ ఫ్రెండ్స్ ఈ రోజు నేను “మెదడుకు పట్టిన బూజు దులపండి” అన్న  అంశంపై మాట్లాడతాను. 

  నేను ఇలా అనగానే -  “నోరుని శుభ్రం చేసుకోవడం విన్నాను, కాళ్లూ చేతులూ శుభ్రం చేసుకోవడం విన్నాను. ఆ మాట కొస్తే కడుపుని శుభ్రం చేసుకోవడమూ విన్నాను, కానీ ఇదేమిటీ మెదడును శుభ్రం చేసుకోమంటున్నారు !” అని మీరు అనుకోవచ్చు. 

 మన ఇంటిని అనేక సార్లు శుభ్రం చేసుకుంటూ ఉంటాము .  పండగలు వచ్చినా  అతిథులు వస్తున్నారని తెలిసినా మన ఇంటిని ఒకటికి రెండు సార్లు శుభ్రం చేసుకుంటాము. బూజు కర్ర పట్టుకుని ఇంట్లోని బూజుని దులుపేస్తుంటాము. చేతి గుడ్డతో తలుపులు, కిటికీలు తుడుస్తాము .  మరి మన మెదడు సంగతి ఏమిటి? దాన్ని శుభ్రం చేసుకోవాలని మీకెప్పుడూ అనిపించ లేదా?? ఆలోచించండి. 

 నేనేమంటానంటే , మెదడుని కూడా శుభ్రం చేసుకోవాలని. ఇంటికి బూజు పట్టినట్లే మెదడుకి “బూజు “ పడుతుంటుంది. అలాగే వదిలేస్తే మెదడు పాతబడ్డ కొంపలా మారిపోతుంది. సోమరిపోతులా ఉండే వాడి మెదడు దెయ్యాల కొంపగా మారిపోతుందని మన పెద్దలు చెబుతుంటారు కదా. నిజానికి సోమరి పోతుల్లోనే కాదండోయ్, అతిగా  నెగెటీవ్ గా ఆలోచించే వారిలోనూ, ప్రతిదానికీ భయపడిపోయే వారి లోను ఇలా మరికొన్ని ప్రత్యేక లక్షణాలున్న వారి మెదళ్లు కూడా బూజు పట్టిన దెయ్యాల కొంపల్లా మారిపోతాయి. 

 మనం ఓ చక్కటి ఇల్లు కట్టుకుంటాము. ఆ ఇంటికి అందమైన పెయింట్లు వేయిస్తాము. ఇంట్లో సర్వాంగ సుందరంగా ఫర్నీచర్ అమరుస్తాము. ఆ ఇంటిని అమితంగా ప్రేమిస్తుంటాము. నిజం చెప్పాలంటే ఇంటిని ప్రేమించినంతగా మన శరీరాన్ని కూడా ప్రేమించడం లేదేమో... కొన్ని  అవయవాల గురించి అయితే పట్టించుకోము. ఓ సారి ఆలోచించండి... మీ కాలేయం ఎలా ఉన్నది ? మీ గుండె ఎలా కొట్టుకుంటున్నది ? మీ ఊపిరితిత్తుల పని తీరు ఏ విధంగా ఉంది ? మీ మెదడు పరిస్థితి ఏమిటి ? ఈ ప్రశ్నలు మీలో ఎంత మంది వేసుకుంటున్నారు. పైపై అందాల కోసం రకరకాల కాస్మొటిక్స్ వాడే మనం - లోపలి అవయవాల గురించి అంతగా పట్టించుకుంటున్నామా...??

నెగెటీవ్ ఆలోచనే పెద్ద బూజు: 

  సరే, మెదడుకి బూజు దులపడం ఎలా.. ? ఇది కూడా ఆలోచించాలి. మెదడుకు బూజు అంటే నిజంగా బూజు పట్టిందని కాదు.  నెగెటీవ్ ఆలోచలు చేస్తూ చివరకు అవే నిజమనీ, అవే శాశ్వతమని నూటికి నూరుశాతం నమ్మేసి , ఇతరులను నమ్మించడానికి ప్రయత్నించే వారి మెదళ్లు బూజు పట్టినట్లే లెక్క. “బూజు కర్ర”  తీసుకుని దులపడం మొదలుపెట్టకపోతే అతి త్వరలోనే వీరి జీవితం దుర్భరమవుతుంది. అతిగా ఆలోచించడం ఎంత ప్రమాదమూ, ఆలోచనలు మందగించడమూ అంతే ప్రమాదమని గ్రహించాలి. 

  అతిగా ఆలోచించడం గురించి ఓ సంఘటన చెబుతాను. మా ఊర్లో ఒక కుటుంబం ఉంది. 

 

భయ భ్రాంతుల నిలయం: 

ఇంటి పెద్ద ప్రతి చిన్న విషయానికీ భయపడుతుంటాడు. అతిగా ఆలోచిస్తుండటంతో లేనివి ఉన్నట్లుగా, ఉన్నవి లేనట్లుగా భావించుకుంటాడు. రోడ్డు మీద నడిచి వెళితే ప్రమాదం జరుగుతుందేమో అనుకుంటాడు. సైకిల్ మీద వెళ్ళాలన్నా, కారులో వెళ్ళాలన్నా భయం.  ఇక విమానం గురించి చెప్పేదేముంది. “తెనాలి” అనే సినిమాలో హీరో లాగా అన్న మాట. ఈ భయాన్ని కప్పిపుచ్చుకోవడం కోసం ఇంటి సభ్యుల విషయంలో అతి ప్రేమ చూపిస్తుంటాడు. ప్రేమతో ఎదుటి  వారి కాళ్లకు సంకెళ్ళు వేస్తుంటాడు.  తాను కదలడు, ఇతరులను ముందుకు కదలనివ్వడు. దీంతో చివరకు ఆ ఇల్లు  “భయ భ్రాంతుల నిలయం” గా మారిపోతుంది.

బూజు పట్టిన బంగళా : 

  మరొక ఇంట్లో  ఒకాయన ఏదీ ఆలోచిస్తున్నట్లు కనబడడు. హాల్ లో పడక కుర్చీలో కూర్చుని తనకు ఎదురుగా ఉన్న ట్యూబ్ లైట్ నో గోడకు తగిలించిన బొమ్మనో గంటల కొద్దీ చూస్తూ కాలం గడుపుతుంటాడు. ఒక సలహా ఇవ్వడు. ఒక వేళ ఇచ్చినా దాన్ని ఇంట్లోని వారు పాతచింతకాయ పచ్చడి అంటూ తీసిపారేస్తుంటారు. కొంత కాలం గడిచే సరికి ఆ ఇల్లు బూజు పట్టిన బంగళాలా తయారైంది. అందులో తిరుగుతున్నదీ మనుషులేనా అన్న అనుమానం కలుగుతోంది. 

యాక్టీవ్ మోడ్ : 

  ఇక్కడ ఒక విషయం అర్థం చేసుకోవాలి. ఆలోచనలను ఎప్పటికప్పుడు అప్ డేట్ చేసుకోవాలి. బ్రెయిన్ ని యాక్టీవ్ మోడ్ లో ఉంచుకోవాలి. ఇంట్లోని ఒకని ఆలోచనలు నెగెటీవ్ గా సాగితే దాని ప్రభావం ఇతర ఇంటి సభ్యులమీదనే కాదు, క్రమంగా అది సమాజ స్థాయికి పాకుతుంది. ఈ సమస్యని వ్యక్తిగతమైనదిగా భావించకూడదు. సమాజ రుగ్మతగానే భావించాలి. 

90 శాతం సక్సెస్ రేట్ : 

 జీవితంలో జరిగే సంఘటనల్లో 90 శాతం నీ ఆలోచనల ఆధారంగా చేసే పనుల వల్లనే సంభవిస్తుంటాయి. నీ ఆలోచనలు సరిగా ఉంటే ప్రతి పని నుంచి 90 శాతం సక్సెస్ రేట్ సాధించుకోవచ్చు. ఆలోచనలు నెగెటీవ్ గా ఉంటే విజయావకాశం కేవలం పది శాతమే ఉంటుంది. ఇప్పుడు ఆలోచించండి, మనం ఎటు పోతున్నాము. కీర్తి శిఖరాలను అధిరోహించిన ఎందరో మహానుభావుల ఆలోచనలు ఎలా ఉన్నాయో గమనించండి. చార్లెస్ రోజెల్ స్విండాల్ అనే మత బోధకుడు తన రేడియో ప్రసంగాల ద్వారా చెడు లక్షణాలను ఎలా వదిలించుకోవాలో తరచుగా చెబుతుంటారు.  90 శాతం సక్సెస్ రేట్ సూత్రం ఆయన చెప్పిందే. 

ఒక రోజు ఆలోచించడం మానేస్తే.. : 

   ఈ ప్రపంచం ఎప్పుడూ మారుతుంటుంది. ఎన్నో నూతన ఆవిష్కరణలు చోటు చేసుకుంటూనే ఉంటాయి. నదిలో పాత నీరు పోయి కొత్త నీరు వచ్చి చేరినట్లు ఎప్పటి కప్పుడు సమాజపు రూపురేఖలు మారిపోతుంటాయి.  మనం ఒక రోజు పాటు ఆలోచించడం మానేస్తే, మర్నాటి కల్లా చాలా దూరం వెనకబడిపోతాము. జీవితం ఓ పరుగు పందెం. కేవలం నడక మాత్రమే నేర్చుకున్న బాలుడు తనకు ఇది చాలని అనుకుంటే అతను ఏనాడూ పరుగెట్టలేడు, విజేత కాలేడు.  అసలు మనం ఎవరితో పోల్చుకుంటున్నాము? ఎవరిని అనుసరిస్తున్నాము?? ఎటు పోవాలనుకుంటున్నాము? ఈ అంశాలమీద క్లారిటీ లేకపోతే మెదడుకు పదును పెట్టకపోతే కచ్చితంగా అది దెయ్యాల కొంపగా మారిపోతుంది. చివరకు నీ భ్రమలూ, భ్రాంతులే ఎంతో విలువైన నీ జీవితాన్ని నాశనం చేస్తాయి. అందమైన నీ జీవన సౌధం కుప్పకూలిపోతుంది. చేతులారా మన జీవితాన్ని మనమే నాశనం చేసుకున్న వారమవుతాము. 

  సమస్యలు లేని జీవితం ఉండదు. ప్రతి సమస్యకు ఓ పరిష్కారం ఉంటుందన్న స్పృహ ఉండాలి. సమస్య పరిష్కారం కొరకు సరైన కోణంలో ఆలోచించాలి. కార్యాచరణకు దిగాలి. ఇందాక చెప్పినట్లు 90శాతం విజయం సాధించడానికి ఈ సూత్రం పనికొస్తుంది. మిగిలిన పది శాతం మన చేతుల్లో లేనిది. కానీ మనలో కొంత మంది ఆ పది శాతం గురించే ఎక్కువ ఆలోచిస్తుంటారు. ఫలితంగా తమ కళ్లెదుటే పరిష్కార మార్గం కనిపిస్తున్నా గుర్తించలేరు. అందుకే అతిగా ఆలోచించడం మానేసి ప్రశాంతంగా ఉండటానికి ప్రయత్నించాలి. చాలా సమస్యలపై విజయం సాధించేది మనలోని ప్రశాంతతే అని గుర్తించాలి. ఇక్కడ ఓ కథ చెబుతాను.

   ఒక యువకుడు నదిలో పడవ మీద వెళుతున్నాడు. అంతలో వరద రావడంతో అతను నడుపుతున్న పడవ అటూ ఇటూ ఊగడం మొదలుపెట్టింది. అతని లో భయం ఆవహించింది. చూట్టూ చూశాడు. మిగతా పడవల పరిస్థితి కూడా అలాగే ఉంది.  ఒక వృద్ధుడు మాత్రం తన పడవని చాలా చాకచక్యంగా వొడ్డుకు చేరుస్తుండటం గమనించాడు. ఆ పడవ దగ్గరకు రాగానే యువకుడు అడిగాడు, “తాతా, నీ పడవని నీవు ఎలా వొడ్డుకు చేరుస్తున్నావు? ఆ కిటుకు చెప్పు”  - అంటూ అడిగాడు. అప్పుడు ఆ తాత నవ్వుతూ, `నాయనా, నేను ప్రత్యేకంగా ఏమీ ప్రయత్నించడం లేదు. నేను ప్రశాంతంగా పడవ నడుపుతూ నా పని నేను చేసుకు పోతున్నాను. అంతే ' అని సమాధానమిచ్చాడు. 

  మనసు ప్రశాంతంగా ఉంచుకోవడం అలవాటు చేసుకోవాలి. అప్పుడు ఏదో జరిగిపోతుందన్న భయం తొలిగిపోతుంది. ఫలితంగా నీ పని మీద శ్రద్ధ పెరుగుతుంది. చివరకు విపత్తు నుంచి బయట పడగలుగుతాము. 

 మన ఆలోచనలు అపసవ్యంగా ఉంచుకుని భగవంతుని మీద భారం వేయడమూ, పరిష్కారం కోసం అడ్డదారులు తొక్కడం మంచిది కాదు. జీవితాన్ని నందన వనంలా మలుచుకుంటామా లేక కీకారణ్యంలా మారుస్తామా అన్నది 90 శాతం మన చేతుల్లోనే ఉంది. ఓ సారి మీరూ ఆలోచించండి.

 - తుర్లపాటి నాగభూషణ రావు 

( వ్యాస రచయిత మోటివేషనల్ స్పీకర్ మరియు సీనియర్ జర్నలిస్ట్ . ఫోన్ : 9885292208 - వాట్సప్)